lunch click ＆ coffee meets bagel -- 有誰共鳴

而家係凌晨 1 點幾，Trina（假名）正在發第 13 條選擇題過來。因為佢我先知原來 Lunch Click（LC）可以問多過 3 題問題，呢晚我同佢互相發問，將 LC 內所有選擇題統統問哂！

Trina 30歲，從事教育工作，樣子不漂亮但笑得甜，身型纖瘦。

從佢既選擇我覺得係幾啱我既人，喜歡文化藝術的活動（甚至係聽講座），內向但又喜歡運動。我 send 完選擇題比佢，佢答左又馬上 send 返幾題問我，令我覺得佢對我都有興趣。雖然已經係凌晨，但我好想可以同佢傾下計再了解多d，但係選擇題又問哂了，LC 又冇 chatroom 功能，可以點好呢？

突然靈機一觸，我 click 左約佢食飯見面既 button，之後選擇最早的約會時間（4小時後），如果佢都同意，咁 chatroom 功能就會係約會前 3 小時（即 1 小時後）開啟，到時咪可以傾計囉！我㩒左制之後心諗希望佢明白我想做乜啦！...不過當然個世界冇咁好彩，佢將約會 reschedule 左去下星期，其實當時我已經好攰，好快就拎住個電話訓着左了。

本來諗住乖乖等到下星期見面，點知到左第二晚，我開  coffee meets bagel （CMB）時，頁面一開果個竟然係 Trina ！又會咁橋都有？唔通一開呢個 Blog 就收得工？咁我馬上 like 佢啦，佢又咁啱 online 左又 like 返我，就係咁，7天的 chat room 之門打開了！

我們的對話就由「What a coincidence！」開始，由興趣、鍾意食乜野、職業、星座，講到信仰、政治立場、愛情的經歷與期望……樣樣都幾投契，之後每晚都 text message，咁又過左幾日。

我將 Trina 既 profile 相 send 左我既女「閨蜜」阿丘（假名，已婚及生了小朋友，是我好耐以前既女友）睇，問佢意見，我話 Trina 唔靚喎，馬上比阿丘鬧到狗血淋頭！佢話我竟然嫌人唔靚真係搵盤水照下自已個樣先啦。而且佢覺得 Trina 算係好可愛自然果隻，而且d相冇（或者冇乜）美圖秀秀過喎。我覺得阿丘都講得啱，加上覺得同 Trina 真係好啱傾！於是就將自己電話比左 Trina ，同埋約佢出黎食飯

好自然咁同佢由 CMB 轉入 Whatsapp 同電話傾，好快又到左約會既日子。

lunch click 第一次約會

人揀我我揀人，就咁就過左幾日。係 coffee meets bagel （CMB）同 Lunch Click （LC）都有 mutual like，咁我就試下聯絡佢地。由於我的搜尋範圍是 27 至 36 歲，所以不會搜到太年青的。

LC 只可以 send 三條選擇題給對方，咁我 send 左比佢地，又等了幾天，有些有回覆，但她們沒有回發問題給我，有些甚至沒有回覆，我真的不知道為什麼？網友可否幫忙解答一下？互相了解多些不是很好嗎？是她們點錯了 like 我，還是覺得玩選擇題好無聊？

至於 CMB 就可以 chat，但佢地都係幾日先覆一句簡單的，我自問都唔算冇話題既人，但係佢地反應咁冷淡好難 chat 落去喎。

雖然冇回覆，我仍然膽粗粗咁係 LC 度約佢地午餐或者晚餐，如是者到左禮拜尾，有一名女孩（A小姐）應約，我都幾開心，原來真係得喎！自中學ICQ年代之後就冇乜約過陌生女仔出街，之前 speed dating 試過幾次，而家約會之旅又再展開了。

A小姐 32 歲，從事教育工作，五官端正，夾長髮馬尾，中等身型，不過衣著有點老土。

約會確定後，LC 會將男方的電話號碼發給女生，男生卻得不到女生的電話號碼。並且 app 會在約會前三小時打開 Chatroom 功能，讓雙方可以互通訊息。我覺得這是很保護女生的設計，不愧是亞洲公司開發的 app，可是作為男生，我的這個「第一次」就相當不愉快了。

我約了她 7:00pm 在尖沙咀一家日本餐廳見面。LC 唔會幫你預約，而呢間餐廳又冇得預約既，咁我就早半個鍾去到，諗住拎定飛或者排好隊，一陣女仔黎到唔洗等太耐就有位坐。我出發時發了個訊息給她，到步後等到 6:45 冇回覆，我果時已經排緊隊應該 7:00pm 可以有位，等到 7 點唔見人又冇電話又冇覆 message，我又再 send message 比佢話我到左已經有位。最後等到 7:30pm 我自己點了菜，約 8:30pm 埋單走人。突然收到 message！一看，原來是 LC send 過來問約會約成點，我諗如果個女仔點錯左或者臨時唔得閒，大可以按「reschedule」或者「I can't make it」，點解要唔出現？佢會唔會出左事？所以我就回覆：「個女仔冇出現，但希望佢冇事。」並請 LC 跟進一下。

晚上約 11:00pm 突然收到 A小姐的訊息

「Damn it! Your text did not pop out till now. Sorry I did’t see it.」

我心諗乜妳講野咁冇禮貌，但仍回覆說「It’s ok. Are you alright?」……但就冇再有任何回覆了。

這就是我在 Dating app 的第一次，一個幾唔愉快既經歷。

但好快又來第二個約會了。

一切從 Dating app 開始（Begin Again）

自從2014年開始便零星參加過不同公司的 speed dating，但沒有遇到過啱傾的人，而且那些經歷大概 Leslie 寫過也不想重覆。最近工作認識了一位非常好的女孩子，交換電話和 Facebook 後才發現原來她已經結婚了，覺得唔可以再懶懶閒咁搵人！

近年看報紙多由 speed dating 轉為報導 dating app。我的經歷也由 app 開始吧！

先 google 一下有D咩最受歡迎的 dating app，最後我選了三個看上去較認真又有特色的來試。

1.lunch click 

每天中午會介紹兩位異性給你，你可剔選合眼緣與否，如男女雙方都互選了，則可挑選 app 內預設的選擇題互相詢問，加深了解，或者直接約對方出來見面。

2.coffee meets bagel

每天中午會介紹 21 位（對，21位，比 lunch click 多 10 倍）異性給你，互相剔選後即可 connect 聊天。但這個聊天室只會維持 7天，如果啱傾就轉用Whatsapp、電話或者直接出黎見，如果唔啱傾 7 天後雙方都無法再收發對方的 message。

3.okcupid

介面是較傳統的交友app，可以好自由咁 Browse 會員 profile。特別之處在於 app 裡有好多選擇題比你回答，大概分為：Lifestyle、Dating、Religion、Ethics 和 sex 幾類，相對可以好詳細咁睇左對方的選擇後先決定 send 唔 send message 比佢。

以後這裡會每星期更新不同 app 的進度，遲d也可能下載新 app 試用。

Lunch click 看上去限制多多，
但我的故事卻是從 lunch click kick off 的

序

轉眼三十幾歲，不自覺已成為一名中佬。幾年前失戀後就沒有正式拍返拖，因工時長、生活圈子窄，係 desperate 到 google speed dating 時，發現了 Leslie 的 Blog《港男週記》，覺得內容客觀充實之餘，每篇字數、節奏，情節編輯得宜，引人閱讀，我很快便成為了他的讀者。 

《港男週記》Blog 在 2015 年 1 月封筆，可能作者已跟某位女士（Kenix？）共諧連理？如果係就真係恭喜哂！可是我沒有他幸運，仍在人海茫茫中尋尋覓覓，又見網上好似冇一個繼續專門寫 speed dating、dating app、相睇公司等的網誌，故此希望以《續港男周記》為題，繼續分享經驗和感受，及提供一些客觀的資料供大家參考。