失敗者的檢討

一直以為自己算善於相處，懂得看別人眉頭眼額，未試過比人咁拒絕法，所以Trina 事件都比我幾大打擊。是時候檢討了。

一．太肥

因為工作壓力和運動量不足，已經成為一件「厚切餐肉」。其實有時間就去運動，但減肥效果麻麻

不過在 Dating app 中我的相片已經係真面具示人，其實我樣貌和身型係點佢已經好清楚啦，點解見面先覺得唔對路？唔通我上鏡靚過真人好多自己唔知？

二．太急進

Trina 其實係慢熱既人，諗返佢都提過我幾次，佢希望我地由普通朋友開始慢慢黎，但我心態已經當左佢係女朋友，每天晚上我都會 send Whatsapp 比佢同埋同佢傾電話，而且我又同佢講過話覺得同佢好夾，覺得佢好適合我，可能佢覺得我太急進嚇親？

三．衣著馬虎

因為真係覺得同 Trina 好熟所以見面當日我冇 gel 頭，同埋只係求其裇衫牛仔褲舊波鞋，裇衫仲有d縐。

四．餐廳選擇馬虎

返復再諗，果間餐廳係唔啱用黎溝女，太平實了，得飯同麵一啲小食都冇。第一次見面都係㨂間好D既先得。

返而比女仔放飛機果次（第 3 集）我著得好好多，點解我對 Trina 咁有好感返而做得咁差呢？我覺得自己衰在「坐定粒六」！邊個人唔想對方整齊清潔，有型有款 / 清新美麗 咁見自己？

綜合以上死因，我為自己定立幾條規則：

一．約會一定要執正d，要去買d新衫新鞋了（已經幾年冇買過新衫）

二．要主動但唔好心急，淡定有錢淨

三．增加運動量，對身體都有益

四．約會地點要精選

正在檢討的時候， Lunch actually （Lunch Click 的母公司）的職員打電話來，問我有冇興趣上佢地公司傾下計，做個分析咁話。我心想推銷時間到了，Lunch Click 比佢地用黎搵 potential client，但我又真係有需要喎...記得之前 Leslie 團購都買過類似既服務，加上呢間公司又撮合過官恩娜同醫生喎，不如上去睇睇。