兩段6年情

尋晚約了 Ruby （假名）晚飯，她是我之前拍了拖六年的女友。有人問單身男女之間會唔會有親密的純友誼？我而家會答如果大家拍過拖，發現真係冇可能係埋一齊，就會有呢種可能。Ruby 同我就係咁，兩個都單身，有時會一齊食飯同睇戲，又會傾好私人既野，但就唔會再係埋一齊。 

果晚佢如常一邊食飯一邊狂玩手機，我真的好難接受另一半係沉迷手機的人，不過唔係成日見佢，而且佢咁同我相處最適服就算了。吃完飯我通常都送她回家，回到家附近會像以前拍拖一樣， 一齊行超市買野……感覺和她一起很自然，又知道佢鐘意 D 乜唔鐘意 D 乜。

送完她返屋企便自己回家，途中覺得感情真脆弱，六年都可以冇結果。有朋友話我難逃七年之癢，但我地係係冇第三者介入下真係覺得對方唔係結婚對象而分手的。而且分手後好似雙方都一直冇再拍拖。

如果呢個 Blog 竟然有讀者，我係度真心分享幾句，好老土咁講「人生有幾多個6年？」我之前同阿丘（第四集）都拍左拖 6 年，其實佢真係好啱我，果次係我第一次拍拖仲好後生唔識珍惜冇左，後來拍過d散拖就到同 Ruby 的 6 年，就咁就過左十幾年，在一般情況下，我想我不會再有下一個 6 年了，可能頂多拍兩、三年拖就要同個女仔諗結婚（因為唔想找太後生的女仔，如果32-36歲的女生就會擔心生小朋友的問題），人到中年先覺得時間真係會將你既青春同機會偷走，唔會再有機會比我「再來一次」。

諗到呢度就會覺得自己有D似許鞍華《黃金時代》𥚃面的蕭紅既性格，一世人其實都冇乜點成長過，只要有得做自己喜歡既事就 OK，由青春期轉眼走到中年，才開始發現身邊的人已結哂婚，過緊一D同自己完全唔同既生活，自己心態則仍然漫步在「青少年」的那片草坪（像巜哈爾移動城堡》中哈爾內心深處那有間小石屋的草坪），一直沒有離開過。

講返 Lunch Actually（LA）

Google 過其他相睇公司，發現呢間公司比其他貴（1/3至1/2），不過看上去 LA 的網頁和服務比較轉專業和正經，更重要是我覺得選這家公司的女孩子在品味和性格上應較適合自己（其他一些公司提供什麼風水轉運法，個人不信風水也不太想另一半喜歡這類型的東西）。

同屋企人、阿丘同其他朋友商量過，雖然價錢貴但如果7000可以換到眞愛好似值得喎。

最後決定遲d去比錢參加。